Ризабек 20 жасқа дейінгі әлем чемпионатында 97 келіге дейінгі салмақта чемпион атанды. Бұған дейін дәл осы жарыста 92 келіге дейін бақ сынап, күміс алған. 

Балуан бірінші белдесуінде былтыр чемпион болған ирандық қарсыласы Аболфазла Давуд Бабаланы 12:1 есебімен жеңіп шықты. Одан кейін грек Николас Караваносты да 12:1 етіп жеңді. Жартылай финалда америкалық Джастин Ли Радемахерді 9:1 есебімен ұтты. 

Ризабек финалда әзербайжандық Хетаг Карсановпен белдесті. Қарсыласына бірде-бір ұпай бермей, 10:0 есебімен айқын жеңіп шықты.

Айта кетейік, Ризабек Айтмұхан ересектер және жастар арасында чемпион атанған тұңғыш қазақ балуаны. Ол 2023 жылы Белградта алтын алған еді. 

Грек-рим күресінен 82 келіге дейінгі салмақта сынға түскен Евлоев финалда әлемдік рейтингте 7-орында тұрған түркиялық балуан Альперен Белберді ұтты. 

Финалдық белдесудегі есеп — 9:3, Евлоевтың жеңісі. 

Турнир барысында Ислам Евлоев Чехия, Германия, Қытай балуандарынан басым түсті. Ал оның жартылай финалдағы қарсыласы белдесуге шыққан жоқ. 

Грек-рим күресінен Қазақстан командасы Испаниядағы әлем чемпионатын 1 алтын, 1 күміс және 3 қола медальмен аяқтап отыр. 

Ислам Евлоевтың алтынынан бөлек, Юсуф Ашрапов (67 келі) күміс медаль еншілесе, Айбек Айтбеков (55 келі), Оңдасын Хамитов (60 келі) және Темірлан Тұрдақын (87 келі) қола медаль жеңіп алды. 

Аталған сында қазақстандық балуандар 2 алтын, 4 күміс және 3 қола медаль жеңіп алды. 

Юсуф Ашрапов (67 келі) пен Ерасыл Жеңіс (82 келі) алтын жүлдегер атанды. Арсен Жұма, Бағылан Қуанышев, Рахат Бержанов пен Джохар Узаровтың еншісінде күміс бар. Ал Айбек Айтбеков, Тайым Амангелді және Диас Сейітқалиевтер турнирдің қола жүлдегерлері атанды. 

Жалпы командалық есепте Қазақстан құрамасы 185 ұпаймен екінші орынға табан тіреді.