дзюдо — Қазақстан және әлемдегі спорт жаңалықтары

Қазақстанда дзюдодан әлем чемпионаты өтеді

admin — Wed, 09 Oct 2024 06:45:20 +0000

Дзюдодан 2027 жылғы әлем чемпионаты Қазақстанда өтеді. Бұл туралы туризм және спорт министрі Ербол Мырзабосынов хабарлады, – деп жазады msports.kz сайты.

Министр Будапешке барған сапарында Халықаралық дзюдо федерациясының президенті Мариус Визермен кездесіп, Қазақстанда дзюдоны дамыту бойынша бірқатар маңызды келісімге қол жеткізгенін мәлімдеді.

«2027 жылы дзюдодан әлем чемпионатын Қазақстанда өткізу туралы келісімге келдік. Бұл еліміз үшін үлкен абырой, әрі қазақстандық спортшылар үшін үлкен мүмкіндік болмақ. Өйткені чемпионат Лос-Анджелес олимпиадасының қарсаңында өтеді. Сонымен қатар Халықаралық Дзюдо Федерациясының академиясының өкілдігін Қазақстанда ашу туралы уағдаластыққа қол жеткіздік», – деп жазды министр.

Биыл Қазақстан Париж олимпиада ойындарын бір алтын, үш күміс, және үш қола жүлдемен жалпы есепте 43-орында аяқтады. Қазақ дзюдошысы Елдос Сметов (60 келі) чемпион атанды. Ол – дзюдодан олимпиадада алтын медаль алған алғашқы қазақ спортшысы. Сондай-ақ Ғұсман Қырғызбаев қола медаль еншілеп қайтты.

Айта кетейік, дзюдодан әлем чемпионаты Қазақстанда бұған дейін де өткен. 2015 жылы Астанада болған бәсекеде Елдос Сметов әлем чемпионы атанған болатын.

Нұрлыхан Шархан Олимпиадада екі дүркін Еуропа чемпионын жеңді

admin — Thu, 01 Aug 2024 08:55:23 +0000

Қазақстандық дзюдошы Нұрлыхан Шархан Париждегі Олимпиада ойындарын сәтті бастады. Отандасымыз бірінші белдесуінде бельгиялық Тома Никифоровтан басым болып шықты.

100 килоға дейінгі салмақта өткен белдесуде отандасымыз белсенді күресті. Нәтижесінде қарсыласы үш рет ескерту алып, шидо саны бойынша Нұрлыхан жеңіске жетті.

Бельгиялық әлем чемпионатының күміс және қола жүлдегері, Еуропа чемпионатының 2 дүркін жеңімпазы атанған.

Отандасымыз 1/8 финалда өзбекстандық Музаффарбек Туробовқа қарсы шығады.

Абылайхан Жұбаназар мен Есмигул Куюлова алғашқы айналымнан аса алмады

admin — Tue, 30 Jul 2024 09:39:38 +0000

Қазақстандық дзюдошылар Абылайхан Жұбаназар мен Есмигул Куюлова Париж Олимпиадасын бірінші белдесуінен кейін аяқтады, — деп хабарлайды msports.kz тілшісі.

Абылайхан мажар елінің спортшысы Атилла Унгвариге жол берді. 81 килоға дейінгі салмақта өткен белдесу жеңімпазы голден скорда анықталды. Абылайханнан бұрын Атилла бірінші әдіс жасады деген шешімге келген төрешілер жеңісті мажар спортшысына берді.

Әйелдер арасында 63 килоға дейінгі салмақта белдесуге шыққан Есмигул Куюлова да жарысты бірінші айналымда аяқтады. Ол Австрия елінің спортшысы Лубьяна Пиовесанаға жол берді.

Айта кетейік, бұған дейін дзюдодан Елдос Сметов Олимпиада чемпионы атанса, Ғұсман Қырғызбаев қола жүлде жеңіп алған болатын.

Ғұсман Қырғызбаев Олимпиаданың қола жүлдесін жеңіп алды

admin — Mon, 29 Jul 2024 12:51:53 +0000

Қазақстан құрамасының қоржыны екінші қола медальмен толықты. Дзюдошы Ғұсман Қырғызбаев Парижде өтіп жатқан Олимпиада ойындарында үшінші орын алды.

66 килоға дейінгі салмақта бақ сынаған отандасымыз қола медаль үшін өткен белдесуде серб спортшысы Страхиня Бунчичтен айласын асырды.

Ғұсман жартылай финалда бразилиялық Виллиан Лимаға жол беріп алған еді.

Ғұсман Қырғызбаев Олимпиаданың жартылай финалына шықты

admin — Sun, 28 Jul 2024 12:13:47 +0000

66 килоға дейінгі салмақтағы қазақ дзюдошысы Ғұсман Қырғызбаев Париждегі Олимпиада ойындарының жартылай финалына шықты. Отандасымыз ширек финалда француз спортшысы Валид Хьярды жеңіп шықты.

Екі спортшы белдесуді ширақ бастады. Валид белсенділік танытты. Ғұсман екі ескерту алды. Белдесу аяқталуға 7 секунда қалған тұста отандасымыз таза иппонмен жеңіске жетті.

Жартылай финалда Ғұсман бразилиялық Виллиан Лимамен белдеседі.

Ғұсман бірінші белдесуінде испан спортшысы Давид Гарсиа Торнені жарыс жолынан шығарды. Одан кейін екі бірдей Олимпиадада жүлде алған Ан Ба Ульдан басым болды.

Абиба Әбужақынова жартылай финалға шыға алмады

admin — Sat, 27 Jul 2024 12:11:20 +0000

Дзюдошы Абиба Әбужақынова Париждегі Олимпиада ойындарының жартылай финалына шыға алмады. Отандасымыз ширек финалда испан қызы Лаура Мартинес Абилендаға жол берді.

48 килоға дейінгі салмақтағы белдесу голден скорға дейін жалғасты. Екеуі де екі ескертуден алды. Нәтижесінде соңғы болып әдіс жасаған испан қызы жартылай финалға жолдама алды.

Қазақстандық дзюдошы жұбаныш белдесу арқылы қола жүлде жолында күрес жүргізеді.

Абиба алғашқы белдесуінде Израильден келген Сара Ришониді жеңді. Одан кейін тайпейлік Чен-Хао Линді 19 секундта жеңіп шықты.

Айта кетейік, осыған дейін ерлер арасында 60 килоға дейінгі салмақта Елдос Сметов жартылай финалға шыққан болатын.

Қазақ дзюдошыларының Париж Олимпиадасындағы қарсыластары белгілі болды

admin — Thu, 25 Jul 2024 14:04:11 +0000

Дзюдодан Париж Олимпиадасының жеребесі тартылды. Қазақ спортшыларының алғашқы қарсыластары анықталды.

Қазақстан құрамасының 8 дзюдошысы да Франция астанасындағы ойындарда турнирді бірінші айналымнан бастайды.

27 шілде

48 кило. Әбиба Әбужақынова – Шира Ришони
60 кило. Елдос Сметов – Торнике Чкадуа

28 шілде

66 кило. Ғұсман Қырғызбаев – Давид Гарсия Торне

29 шілде

73 кило. Данияр Шамшаев – Муроджон Юлдошев

30 шілде

81 кило. Абылайхан Жұбаназар – Атилла Унгвари
63 кило. Эсмигул Куюлова – Любьяна Пёвесана

1 тамыз

100 кило. Нұрлыхан Шархан – Тома Никифоров

2 тамыз

+78 кило. Кәмила Берліқаш – Адиясурен Амарсайхан

Қазақ дзюдошылары қай күндері татамиге шығады?

admin — Wed, 24 Jul 2024 06:01:22 +0000

Париждегі жазғы Олимпиада ойындарының басталуына 2 күн ғана уақыт қалды. Париж Олимпиадасында 80 қазақстандық спортшы сынға түседі. Алғашқы бәсекелер 25 шілдеде басталмақ.

Татамидегі дзюдо бәсекелері 27 шілде күні басталады. Дәл осы күні Қазақстан құрамасы сапында Елдос Сметов (-60 кило) пен Абиба Әбужақынова (-48 кило) жүлде жолындағы күресін бастайды. Қазақстан уақытымен сағат 13:00-де басталады. Тікелей эфирде Qazaqstan ұлттық арнасы хабар тарататын болады.

27 шілде:
Абиба Әбужақынова — 48 кило
Елдос Сметов — 60 кило

28 шілде:
Ғұсман Қырғызбаев — 66 кило

29 шілде:
Данияр Шамшаев — 73 кило

30 шілде:
Абылайхан Жұбаназар — 81 кило
Эсмигуль Куюлова — 63 кило

1 тамыз:
Нұрлыхан Шархан — 100 кило

2 тамыз:
Камила Берліқаш — +78 кило

3 тамыз:
Командалық жарыс

Қазақстандық дзюдошы қыз Олимпиадаға жекелей сында да қатысатын болды

admin — Tue, 16 Jul 2024 09:04:25 +0000

Қазақстандық дзюдошы Эсмигүл Куюлова Париж Олимпиадасында жекелей сында да белдеседі. Бұл туралы федерацияның бас хатшысы Айбек Имашев мәлімдеді.

«Эсмигул Куюлованың жекелей сында өнер көрсететіні расталды. Бұған дейін ол аралас командалық сайыста белдесуге квота алған болатын. Енді оған тағы ұпайлар қосылып, Халықаралық дзюдо федерациясы Куюлованың 63 келіде жекелей сында күресетінін растады», — дейді Имашев ҚР ҰОК сайтына берген ресми сұхбатында.

Еске сала кетейік, Эсмигүл Куюлова дзюдодан Азия ойындарының (2023) және Азия чемпионатының (2024) қола жүлдегері.

Париж Олимпиадасында Қазақстаннан жалпы есебі сегіз дзюдошы бақ сынайды.

Әйелдер:
Абиба Әбужақынова — 48 кг
Эсмигуль Куюлова — 63 кг
Камила Берліқаш — +78 кг

Ерлер:
Елдос Сметов — 60 кг
Ғұсман Қырғгызбаев — 66 кг
Данияр Шамшаев — 73 кг
Абылайхан Жұбаназар — 81 кг
Шархан Нұрлыхан — 100 кг