Тимур Құлыбаевтың Halyk қайырымдылық қорының «Ауыл спорт – 2025» жобасының жеңімпаздары халықаралық аренаға шығып, ел қоржынына бірден екі бірдей алтын салды.
2026 жылғы 25–29 наурыз аралығында Түркияның Анталия өңіріндегі Сиде қаласында өткен «Antalya Volleyball Friendship Cup U-16» халықаралық жастар турнирінде Қазақстанның жас спортшылары тарихи жетістікке қол жеткізді.
Бұл додада Жетісу облысы, Ақсу ауданы, Жансүгіров ауылының қыздар командасы мен Алматы облысы, Іле ауданы, Өтеген батыр ауылының ұлдар командасы Қазақстан намысын қорғады. Ауылдан шыққан қарапайым балалардың қажырлы еңбегі, табандылығы мен жігері оларды үлкен жеңіске жеткізді.
Halyk қоры жарысқа дейінгі дайындық кезеңін де жоғары деңгейде ұйымдастырды. Қыздар командасы Алматыдағы кәсіби волейбол орталығында жаттығып, техникалық және тактикалық шеберлігін жетілдірсе, ұлдар командасы Балқаш ауданының Бақанас ауылында оқу-жаттығу жиындарын өткізіп, физикалық дайындығын шыңдады. Бұл дайындық олардың әр ойында сенімді, жинақы және жігерлі өнер көрсетуіне негіз болды.
«Балалар біз ойлағаннан да жақсы ойнады. Halyk қайырымдылық қоры біздің барлық шығынды — оқу-жаттығу жиыны, жатын орын, тамақты төледі. Ауыл балаларына бұл — үлкен мүмкіндік. Біздің балаларға мұндай тәжірибе сыйлағаны үшін қорға алғыс айтамыз!» — дейді бапкер Ғалым Ғайнол.
Турнир барысында қазақстандық командалар қарсыластарын бірінен соң бірін айқын басымдықпен жеңіп, финалға жолдама алды. Қыздар финалда Түркияның «GAZI» клубымен кездесіп, 2:0 есебімен сенімді жеңіске жетті. Ал ұлдар құрамасы да дәл осы қарсыласты 2:1 есебімен ұтып, чемпион атанды.
«Бұл – бүкіл Қазақстанның жеңісі. Ауылдан шыққан жас спортшыларымыз халықаралық аренада ел намысын абыроймен қорғап, көк туымызды биікке көтерді. Бұл жетістік – олардың табандылығы мен еңбегінің, сондай-ақ, ауыл жастарына мүмкіндік берудің нақты нәтижесі. Біз алдағы уақытта да таланттарды қолдап, олардың үлкен спорттағы жолын жалғастыруға бар күшімізді саламыз», – деді Қордың Атқарушы директоры Ғалымбек Жақсылықұлы.
Жеке шеберлігімен ерекшеленген ойыншылар да назардан тыс қалмады. Қыздар құрамасының шабуылшысы Құралай Бәкен турнирдің үздік ойыншысы атанса, ұлдар командасынан Адмир Махамеджанов дәл осындай мәртебеге ие болды. Олардың өнері – бүкіл елдің мақтанышы.
«Жарыс өте әсерлі әрі қызық өтті. Онда әр елден келген мықты спортшылар болды. Оларды жеңу оңай болған жоқ, халықаралық дода шеберлікті талап етеді. Мұнда біз өзімізді емес, ел намысын қорғауды ойладық. Жарыс күнін асыға күттік. Дайындық барысы қызу өтті. «Ауыл спорт» жобасына дайындаған жатын орны, тамақ, шетелдегі естелік үшін рақмет. Алғысымыз шексіз. Бұл тек біздің емес, ата-анамыздың, бапкерлеріміздің, бүкіл ауылдың арманы», — деді жеңімпаздардың бірі Мағжан Әріпжанов.
Бұл жеңіс «Ауыл спорт» жобасының маңыздылығын тағы бір мәрте дәлелдеді. Ауылдан шыққан таланттарға мүмкіндік берілсе, олар халықаралық деңгейде де топ жарып, көк туды көкке көтере алатынына айқын дәлел. Қазақстанның көк байрағы Анталия төрінде екі рет желбіреді. Бұл — ел тарихындағы жас спортшылардың жарқын белесі.
Халықаралық турнир туралы не белгілі?
«Antalya Volleyball Friendship Cup U-16» – жыл сайын Түркияда өтетін халықаралық жастар турнирі. Турнирге әдетте Түркияның жетекші клубтарымен қатар, Азия мен Таяу Шығыс елдерінің командалары қатысады. Қазақстан командалары бұл турнирде сәтті дебют жасап, бірден чемпион атанып, халықаралық деңгейдегі әлеуетін айқын көрсетті.
