Күрес түрлері — Қазақстан және әлемдегі спорт жаңалықтары

Демеу Жадыраев Париж Олимпиадасының финалына шықты

admin — Tue, 06 Aug 2024 16:40:29 +0000

Қазақ балуаны Демеу Жадыраев Париждегі Олимпиаданың финалына жолдама алды. Отандасымыз жартылай финалда әзербайжандық Санан Сүлеймановты айқын жеңіп шықты.

Грек-рим күресінен 77 килоға дейінгі салмақта бақ сынап жатқан отандасымыз белдесуді ширақ бастады. Бірінші болып ұпай алды, артынан әдіс-айласын асырып, бірінші кезеңде 6:0 есебімен басым болып шықты.

Екінші кезеңді де сәтті өткізген Демеу 6:1 есебімен қарсыласын айқын жеңіп шықты.

Финалдық бәсеке ертең өтеді. Демеу жапондық Нао Кусакамен кездеседі.

Құтты болсын қазақ елі!

Демеу Жадыраев – жартылай финалда! Отандасымыз атақты қырғыз балуанын жеңді

admin — Tue, 06 Aug 2024 12:34:33 +0000

Қазақ балуаны Демеу Жадыраев Париждегі Олимпиада ойындарындағы екінші белдесуінде қырғыз Ақжол Махмұдовты жарыс жолынан шығарды. Осылайша жартылай финалға жолдама алды.

Грек-рим күресінен 77 килоға дейінгі салмақта өткен белдесуде Демеу қарсыласын 3:1 есебімен жеңіп шықты. Ақжол қазақ балуанына басты қарсыластың бірі болатын. Екі дүркін әлем чемпионы, үш дүркін Азия чемпионы, Токиодағы Олимпиада ойындарының күміс жүлдегері болатын.

Жартылай финалдағы белдесулер Қазақстандағы уақытпен кешкі сағат 21:15-те басталады. Финалға жолдама үшін таласта ол Әзербайжан балуаны Санан Сүлеймановпен белдеседі.

Қазақ балуаны бірінші белдесуінде колумбиялық қарсыласын айқын жеңіп шыққан еді.

Айдос Сұлтанғали әйгілі қырғыз балуанын жеңе алмады

admin — Mon, 05 Aug 2024 14:30:10 +0000

Қазақ балуаны Айдос Сұлтанғали Париждегі Олимпиада ойындарын сәтсіз бастады. Отандасымыз бірінші белдесуінде қырғыз спортшысы Жоламан Шаршенбековтен айласын асыра алмады.

Белдесуде бірінші болып Айдос ұпай алған. Қырғыздар челлендж беріп, ұпай алынып тасталды. Нәтижесінде екі балуан бірінші кезеңді 2:2 есебімен аяқтады.

Екінші кезеңде Жоламан шеберлік танытып, ұпай басымдығын арттырып кетті. Нәтижесінде 6:3 есебімен Айдос қарсыласына жол берді.

Айта кетейік, бұған дейін 130 килоға дейінгі салмақта Әлімхан Сыздықов ширек финалға шыққан еді.

Жас балуандар Азия чемпионатында екінші орын алды

admin — Mon, 22 Jul 2024 09:57:57 +0000

Тайландта грек-рим күресінен 20 жасқа дейінгі спортшылар арасындағы Азия біріншілігі аяқталды, – деп хабарлайды ҚР ҰОК.

Аталған сында қазақстандық балуандар 2 алтын, 4 күміс және 3 қола медаль жеңіп алды.

Юсуф Ашрапов (67 келі) пен Ерасыл Жеңіс (82 келі) алтын жүлдегер атанды. Арсен Жұма, Бағылан Қуанышев, Рахат Бержанов пен Джохар Узаровтың еншісінде күміс бар. Ал Айбек Айтбеков, Тайым Амангелді және Диас Сейітқалиевтер турнирдің қола жүлдегерлері атанды.

Жалпы командалық есепте Қазақстан құрамасы 185 ұпаймен екінші орынға табан тіреді.