Футболдан Қазақстан ұлттық құрамасының бас жаттықтырушысы Станислав Черчесов Словениямен өткен матчтан кейінгі баспасөз жиынына қатысып, журналистер сұрағына жауап берді. Сондай-ақ ойын мен футболшыларға баға бере кетті, – деп хабарлайды dodatimes.kz тілшісі.
Нәтиже таблода тұр. Өкінішке қарай, бүгін Словения көп тұста мықты болды. Олар қағаз жүзінде де мықты еді. Бірақ біз ұпай аламыз деп келгенбіз. Олай болмады. Біз біліп келген қателікке бой алдырдық. Соның зардабын таттық, – дейді бапкер.
Станислав Черчесов «Стожице» стадионындағы жасыл желек жайлы сұраққа да жауап бере кетті.
Алаң екі командаға ортақ. Олар жақсы жағында, біз жаман жағында ойнаған жоқпыз. Олардың мықты ойыншылары басымдық алып кетті. Әйтпесе, біз екінші таймда жақсы-ақ ойнадық. Бірінші таймның бірінші жартысын сәтсіз өткіздік. Бұл енді алаңға үйрене алмау мен словендердің қысымы да болса керек. Ойынды кейін толық қарап, қандай да бір қорытындысын айтамын. Ал алаң жайлы сұрамағанда, айтпас та едім, — деді.
Қазақстан құрамасы екі ойында (Алматыдағы Норвегиямен кездесу) екі рет қана дәл соққы жасаған. Бұл статистика да журналистер назарынан тыс қалмады. Бұған да ресейлік маманның жауабы дайын болды.
Мен бірінші ойыннан кейін жігіттерге доппен көбірек жүруді айттым. Қарапайым жағдайда доптан айырылып қалмауды тапсырдым. Бір айдан кейін командада басқа күш болады деп ойлаймын. Себебі «В» тобы «С» тобындағыдай емес. Мұнда мықтылар ғана ойнайды. Біз көбірек шабуыл жасауға тырысатын ойын көрсетуді қолға аламыз, — дейді Черчесов.
Қазақстан құрамасы келесі ойынын 10 қазан күні сырт алаңда Аустрияға қарсы өткізеді.
